Graham Greene
Dene nadołthı dëne
Graham Green Oscar ha bezı nı̨t’ą nı actor ha t’oho ɂerıhtł’ıs net’ı̨ holı̨ Dances Wıth Wolves chu Maverıck ha.
Graham Oneıda dëne hęlı̨ sı Sıx Natıons Grand Rıver des nedhe tł’ule k’eyaghe hots’ı̨, Toronto hots’ı̨ nasesk’athe ts’ęn ɂı̨łaghe sadzıe beschęnę k’é. Actıng k’ı̨ya ts’ęn tth’u, Graham tsątsąne ɂëłıłt’us dëne ghı̨lé yoh chogh k’e tsątsąne ghalana dëne chu yatı nałtsı́ hoghełnı̨ dëne nı. Graham actıng honeltęn ha yek’ı̨ya nı Center dënededłı̨ne theatre hųlı̨ Toronto ts’ęn ́1974 hu ɂënat’é nı. Ku ɂeyer tł’ąghu theatre ha actor hı̨lé nı̨ Toronto ts’ęn, bets’enı̨ Gary Farmer chu ɂëła nahı̨dher nı. Graham TV chu fılm hołe ha la nełnı́ hıjá hu Spırıt Bay chu Runnıng Brave hu Powwow Hıghway k’e boret’ı̨ hıjá nı.
Ku Graham la nedhe ɂëdenełną nı 1990 Dances Wıth Wolves heł, Kevın Costner chu ɂëła bek’e boret’ı̨ nı. Graham tth’ı Kıckıng Bırd hulye ghı̨le nı ɂeyı k’e Lakota yatı henerenı̨ nı ɂeyı ɂa, Graham hadı hu horena nı henı̨. “K’asjęnę ɂı̨łaghe sa bek’enaıdher nı ɂeyı yatı heresdęn ha. Ɂı̨ła dzı̨ne k’e k’asjęnę 8 sadzıe bek’enaıdher ɂı̨ła dzerata bek’etł’a. Nak’e benasnı hu kudąne benasnı̨hılé nı ɂeyer k’abı̨ hu. Seba horena nı̨.”
Kulı Graham ɂası k’ı̨ya de ɂënat’ele, hotıe haıyı̨lá nı̨ ɂeyer hotł’ąghe hu. T’a la thełtsı̨ Kıckıng Bırd hulye k’ı, Graham bezı nı̨t’ą nı 1991 k’e dëne ts’enı ha Academy Awards Al Pacıno, Bruce Davıson, Andy Garcıa, Joe Pescı t’ą yenełną Goodfellas k’e ghı̨yı̨ ha.
Graham tth’ı dëne ha hotıe dëne hodaharı̨tą̨́ sı, dëne k’esı la betł’alyé ha, k’ąnı thılé Aaron Sorkın bets’ı̨ Molly’s Game hulyé k’e Jessıca Chastaın hel 1995 hotıe holı̨ nı, tsąmba nezų thełtsı̨ ɂeyı ɂerıhtł’ıs nadá k’ı, ku ɂeyer hu Dıe Hard wıth a Vengeance Bruce Wıllıs tth’ı hel ghı̨yı̨ nı̨. Graham bezı nezų hąla sı, 1994 Gemını Award nełną nı Adventures of Dudley the Dragon k’e, ku ɂeyı heł 2004 k’e t’a ɂası thełtsı̨ sı ha bek’anotá ha Gemını Award betł’at’ą nı. Ku honezı ɂası ha bek’anota hadé Graham ɂedırı bek’e boret’ı̨ nı, Skıns, The Green Mıle, The Shack chu Wınd Rıver k’é.