George Starke
Dzoł dëne NFL hel senaı̨dher Offensıve Lıneman hulyé
George Starke yunısı NFL dzol dëne hel senaı̨dher nı̨ Offensıve Lıneman hulye dëne nabı̨ thęyı̨ Washıngton Redskıns hel. 1983 nęnę k’e SuperBowl tth’aı chogh hodonı̨łną nı̨ Mıamı Dolphıns ghą nełną ɂá.
George, Mohawk dënedédłı̨ne ts’ı̨ɂąne dëne hęlı̨ sı bą sesk’athe, New Rochelle haıyórı̨lá, New York ts’ęn neyą nı̨. Beta sekuı honéłtęn hu bą ɂeya k’elnı̨ hęlı̨. Yunısı 50s chu 60s honare neyą nı̨, George dëne łą yedąnęlı̨le nı̨ dënedédłı̨ne chu dënezęnę ts’ı̨ɂąne hęlı̨ nı̨ ɂa, kulı yedaręt’ele nı̨, George hoɂąsı ɂëdoreldzaı hu ɂenat’elé nı̨.
“Sekuı t’ą dënezęnę ts’ı̨ɂąne k’e t’ok’e bets’ı̨ ɂerıhtł’ıs koę naradé nı̨. Setthıkuı t’ok’e t’a tthot’ı̨ne hots’ı̨ ɂerıhtł’ıs koę nasther hası̨lá nı̨. ɂeyı ɂá tthot’ı̨ne sekuı hadanı̨dhęn hu horelyų dënedelzęn ɂestudanet’ı̨ne chu ɂası k’odorelyąlé. Ɂeyı chu t’ok’e dëne ɂëstudanęt’ıle naré naradé nı̨. Ɂeyı ɂa hotıé ɂëdoresdzaı hotıe degharé hasá ha. Dëne honełnı̨ hoɂą. Dzolé footbal sats’edé k’esı́.”
Ku dųhųn dëne nedhé hultá NFL ha dé, George t’at the yunı̨łther ba horená nı̨. Ɂerıhtł’ıs koę huyá dzolé senaı̨dher hu, bets’ı̨ coach hotıe yets’ı̨nı̨. Mr. Ryan hulyé. ɂeyer hotł’ąghe hu George Columbıa ɂerıtł’ıs koę nedhe naı̨dher nı hu dzol senaı̨dher nı̨, erhıtł’ıs koę tth’ı hotıe huyá hu. Ku ɂenat’é tł’ąghé hu, George dzolé k’ı̨yá kulı ba horenılé nı̨. Holą ɂëdoreldzaı kulı tthų NFL dąghaı ha dué nı̨. T’at the hu Washıngton Redskıns ha horı̨łdzaı hu t’ą k’older hayéłnı̨ hu due senaı̨dher sı yełnı̨. Kansas Cıty Chıefs chu Dallas Cowboys tth’ı kodaıyı̨la nı̨.
Kulı George ɂenat’ehıle nı̨. Washıngton ts’ęn nájá hu ɂałų ɂedoreldzaı nadłı̨ Redskıns ha. 1973 hu ɂëdonełną nı̨ hılchu yeł senádher ha ɂeyer hotł’ąghe hu honı hajá nı̨ NFL hel. George 10 nęnę ts’ęn yeł senaı̨dher nı̨ hotıe horezų hołtsı̨ tth’ı heł t’ą dëne hel senáı̨dher, horelyų ɂa taghe Super Bowl tth’aı chogh hodonı̨łną nı̨, 1983 Mıamı Dolphıns tth’ı ghą danı̨łną hu. Kulı t’atthe ɂası ha honét’ı̨ dé “Head Hog” hudzı ha nı “Hogs hulyé hots’ı̨ heł, Redskıns hots’ı̨” ɂëła nadarełya hots’ı̨. George dųhų Los Angeles ts’ęn nadher sı Calıfornıa bets’ąne Petra chu bı̨yese hel.