Taboo
Hip Hop ʔú, shen chú daltłi dené hęlį
Taboo, Jimmy Gomez tth’i húlye, ʔediri bezí tth’i xa bek’óją, Grammy Award shen bazį néłną, The Black Eyed Peas xéł
Boyle Heights, California nǫk’e nįya, East Los Angeles néyą, Taboo Shone chú Mexican ts’įʔáné dene hęlį, t’aúk’e hots’į dene hęlį, bets’į Shoshone heritage, hųtł’édhé yek’ólyąʔíle nį, ʔąłnedhe hethelį tł’ąghe, ʔeyer k’anį ʔedek’ólyą hájá, betsuné bąyuné ts’įʔáné háyonéłtą, Jerome Arizona hots’į hat’į nį betsuné,betsuné degháré ts’én yets’įnį nį ʔediri shen dené hethelį, hok’étł’á ts’én hǫzų hotié hayéłnį, yati nezų yeba thełʔą
“beba yízį senáidher walí, shen t’á senáídé łínį, dastłi xa sinįé hasįʹłthen łínį, ʔedinį tth’i daltłi k’ólyą nįʔąʹ, t’ąnt’ú shen k’ólyą sek’e hayįʹlá, ʔeyi t’á setsuné łeghąnįdher ʔú beyuʔąʹzįʹ seke láhújá, dechen tél k’e dastłi dé, setsúné bets’į beyuʔąʹzįʹ dene nátseri henesłé hát’įʹ”
will.i.am chú apl.de.ap xéł náyathełti tł’ąghe dats’ehdíł kǫę club of LA., eyer dene hįnįé harąlá nį, Taboo horelker Black Eyed Peas hárįghą xa 1995 hoyághe, bets’į group ʔałų multi-platinum albums danįłną, Elephunk, Monkey Business, ʔú tth’i The E.N.D., The Black Eyed Peas hotié bek’óją hobets’į number one hits, Where Is The Love?, Boom Boom Pow, ʔú tth’i I Gotta Feeling, ʔeyi shen t’á łą ʔasíe dánéłną, multiple Grammy, Billboard, MTV, Juno, tth’i American Music Awards dánéłną, eyi tth’i dayįʔíle, ʔałų łą
hotié ʔasíe béł ʔasíe ʔełtth’i horeltth’er nįdhen kólú Taboo béł horúná, 2004, Taboo stage 2 béł búlʔą beghézé k’e gu héts’edi, t’a chemotherapy t’a hoʔązį nátseri hįłchú, duhų gu bets’įʔíle, tth’i belay ʔįłághe single herįnį The Fight húlye, ʔeyi shen k’e ʔedeghą holnį t’ąnt’ú húyáy gu bets’į xéł, tth’i belay t’a tsąmba korelʔį The American Cancer Society ts’én tetł’i hayįlá
Taboo dene xéł hok’enádher Indigenous rights in North America bazį, ʔediri Dakota Access Pipeline horélʔįʔíle bazį yałti ʔeją Standing Rock, North Dakota, Taboo shen chú video herįnį, Stand Up/Stand N Rock #NoDAPL 2016 hoyághe, Standing Rock Reservation chú Sioux Tribe k’edarenį bazį, ʔediri ts’éthįé kólú danįtł’éth hok’enádé pipeline dáíłtį bazį, Taboo tth’i hųtł’édhé nįdhen denegódhé ts’énįe xa, sekwi hónelten kǫę nadá ʔú, denegódhé xéł dáyałti ʔú, denegódhé ts’énį t’at’ú nįdé dánįdhen bazį, hobexa ʔekónt’ú nádóreltth’i xa